Ni' yjan 1986 yaan ñi ta'a na Cenciu yaa' sca yu doctor nu n'ni cunta quiloo nten, nu ndi’in loo quichen Londa'a si’yana cu'ni cunta yu xca tso’ quiloo ñi nu ti' ndaa xaa can', yu doctor juin yu lo’o ñi si’yana tucui 'a ña'an ti' tyu'hui xaa 'in ñi si'ya yuhua' nu nchcua ñi ti' cua' s'ni.
Xa cua' m'ni cunta yu quiloo ñi, mdaa yu suun lo'o ñi si'ya cha' can', xi'in 'a lca 'in ñi nguinu ñi tucua snan tsaan ña'an 'in hua, lja xa can' msi'i hua sca nan ndlo jyiin 'in ñi, cui’ nan nu nda'an tu'hua ne', si'yana a ca ndaja ti' ñi nducua xitñan' ñi ña'an 'in hua. Xacan' Ndiose mdaa Ñi cha' tiyaa 'in ñi nu quija lyoo ñi sca tñan nu nchca ti' Ndiose cu'ni ñi: ¡Cui' tñan nu culyoo ñi jyiin cha' tñan!.
Cui' tsaan can' ñi ta'a na Cenciu mdlyo ñi culoo jyiin cha' tñan, xa ngunen 'in hua jyiin can', nguñicha' hua 'in ñi la m'ni cha'an ñi 'in na, xacan' juin ñi 'in hua si'yana lca na sca jyiin mdaa Ndiose 'in ñi, se'en nu ndyaa ñi xu'hue 'in Ndiose. Juin ñi 'in hua si'yana nchca ti' ñi taa ñi sca jyiin cui ti 'in Ndiose, lo'o nchgaa lca cusya 'in ñi, lo'o nchgaa lca tiquee ñi, lo'o nchgaa cha' tiyaa 'in ñi, a cunta lo'o nchgaa juesa 'in ñi, si'yana cui' Ñi mtñan nchgaa loo nan lo' cui' ñi ndlo ñi tñan nchgaa cha'.
Xca tsaan can' yten hua lo'o cuhui' 'in hua, se'en nxitñan ñi ta'a na can', si’yana ncua ti' hua cula ñi 'in na quine 'in cuhui' 'in hua, una a ncua 'a quia yu'hui ti' ñi 'in na, si'yana mchca na ni' cha' tiyaa 'in ñi. La lyee 'a mjñan ñi 'in Ndiose si'yana tca quia yu'hui ti' ñi 'in na, una la nde cua' ngusiin can' nguia yu'hui ti' ñi 'in na, la xacan ngune 'in yu sñen' hua 'in na.
Cui' tsaan can' Ndiose mdaa ñi sca cha' tiyaa 'in hua, nu xi'i hua sca grabadora lo'o sca casete, si'yana can' tca chu'hui se'en tyi'i jyiin cui ti can' cua' yaa ña'an nguiaa ndyi'o na, una chin' ti tsaan mdijin na mtsa'an sca tso' cintya 'in casete can yu'hui se'en jyiin cui ti' can'. Can' nguiaa nchca jlyo ti' hua si'yana lca sca cha' cuiya' nu ndaa Ndiose 'in ñi, ña'an ca si'yana quichen 'in ñi nu ndi'in se'en lyi'ya loo cha' tñan tca cula lo'o jun 'in Ñi lo'o ycha' jun, tsalo ti' ndiya lyijyi ycha' chu'hui loo jyiin can'.
Ycui' hua lo'o ñi si'yana tca tayaa' hua 'in ñi, nu su'hua hua cha' tñan loo jyiin can', cuaña'an yaa m'ni chu'hue hua ycha' nu chu'hui loo jyiin can', lo' cui' ñi ta'ana Cenciu nguiaa ndlyo ñi tyi'i na, cuaña'an m'ni cha'an ñi sca casete can' ntsu'hui jyiin 'in na. Xa nu yu doctor can' ycui' yu lo'o ñi si'yana cua' tca xitucui nde ña'an 'in ñi, mxitucui ñi lo'o sca xaa nu tsu'hue ña'an ñi' cusya 'in ñi, si'ya tñan, cha' cuiya' un mdaa Ndiose 'in ñi, nu tsalo'o ñi quichen 'in Ndiose se'en nu cu'ni tnu jun 'in Ñi lo'o jyiin cha' tñan.
Cuaña'an tsu'hue tsu'hue ti yaa mdyi'o jyiin cha' tñan hasta mdiyaa na cuiya' 24 lo'o letra 'in na, xacan' ngunan ñi 'in jun ndla sne, si'yana tayaa' yu ca graba jyiin can', si'yana quine yu'hui na se'en ndi'in jun ta'a na, cuaña'an yaa quiñan ñi ta'a na can' mdyisnan ñi cuiya' 25 hasta cuiya' 200, ndlyo ñi jyiin un nchcui' ña'an ntsu'hui cha' ca tsu'hue chu'hui tiquee na, xa ndijin na cha', cha' tsu'hue 'in Ndiose, cha' tlyu ti' 'in ñi, ña'an ntsu'hui cha' ca na sca sñe' ñi, ña'an tyaa na cunta tloo ñi, ña'an tyi'o na loo can' 'in laxa'an, ña'an cu'ni na canaan nchgaa cha' un ljyan 'in na, ña'an ndaa ñi nan nu najo'o 'in na, cha' xquee' nchca loo chendyu re, ña'an tyaa ti' na, ña'an culo na loo cha' tsu'hue 'in ñi, cha' nu ljyan loo Quityi 'in Ndiose, cha' 'in Jesus ña'an mdijin nu ti'i si'ya qui'ya 'in na, lo' ña'an mdyiqui'o ñi, nchgaa cha' nu m'ni ñi yaan ñi loo chendyu re, ña'an ntsu'hui cha' xitucui ñi xiya', cha' cuiya' nu ntsu'hui 'in ñi, cha' tsu'hue 'in ñi, cha' nu ntsu'hui cha' caja'an ña'an sñe' Ndiose lca na, ña'an ntsu'hui cha' ca sca cha' ti' 'in na lo'o ta'a na, ña'an cuan xu'hue na 'in scasca ta'a na nu tiyaan se'en ndi'in na, nchgaa cha' nu ndiyato'o loo chendyu 'in na, ña'an nchca ti' xa nchca cune' sca cuhui', xa ndyijyi culyi'o sca ta'a na, nchgaa loo cha' tsu'hue 'in Ndiose, xa tyisnan na sca tñan, xa nchcua yjan, uta xa nde'en cha' quicha ndijin na, uta xa ndyio sca ta'a na loo chendyu, ña'an ntsu'hui cha' caja sca chendyu nu a tsa tii 'a 'in na la ni' cuaan.
Cua' ñii cua' mdijin 30 yjan lo' ñi ta'a na Cenciu ljyan quiñan ñi ndlyi'o ñi jyiin cha' tñan si'yana lca na sca tñan lo'o cha' cuiya' nu mdaa Ndiose 'in ñi. ¡Cui' Ndiose nu ntsu'hui cha' cu'ni tnu na tsala xaa! AMEN
Ñi ta'a na Davi
